Eguerdi eta arratsaldeko lehen orduetan mendebaldetik beste fronte bat iritsiko da, eta euritara joko du. Zaparradak botako ditu, tarteka gogotik gainera, bereziki gauean. Goizean hego-mendebaldeko haizea nagusituko da, eta arratsaldean ipar-mendebaldekoa nagusituko da. Tenperaturak antzeko jarraituko du, eta 16-18 gradu harrapatzera iritsiko gara.
Bihar petral hasiko da eguna; honela, hodeiek zerua estalirik izango dute eta euri giroa nagusituko da. Zaparradak sarri botako ditu, tarteka mardulak izango dira, eta litro politak pilatuko dira. Arratsaldean zehar zaparradak tartekatuagoak eta ahulagoak izango dira, baina ez du atertuko eta giro bustiak jarraipena izango du. Ipar-mendebaldeko haizea nagusituko da, eta tenperaturak koska polita behera egingo du, gehienez 13-15 gradu harrapatuko ditugu.
