Hala ere, tantaren bat salbu, giro ateri eta lasaia izango da eta gainera eguerditik aurrera ostarte politak irekiko dira. Arratsaldeko ordurik gehienak giro lasaiarekin joango dira. Gauean hodei gehiago izango da, tantaren bat baztertu gabe. Hego-haizeak zakar edo oso zakar jotzen jarraituko du. Tenperaturak beste koska bat gora egingo du, 18-20 graduan joz goia.
Bihar goizean hodeiak eta ostarteak tartekatuko dira eta giroa lasaia eta atsegina izango da orokorrean, mendi kontraren batean tantaren bat baztertu gabe. Eguerditik aurrera hodeiak ugaritu, zerua estali eta euritara joko du. Zaparrada batzuk emango dira, orokorrean indar handirik gabeak eta litrotan ez da askorik pilatuko. Haizea aldakor antzean eta ahulago ibiliko da, goizean hego ukitu batekin eta arratsaldean iparraldekoarekin. Tenperatura antzeko kokatuko da, 18-20 graduan joz goia.
