Inauteriak hurbiltzen ari dira. Haien doinua gero eta hurbilago entzuten dugu, funtsean, taupada horiek gure barrutik irteten direlako. Sentimendu erabat baikorrak pizten dituzten taupadak dira, batzuk dena beltz ikustarazten saiatzen diren garai hauetan.
Xuxurla horiek belaunaldien arteko festa herrikoi batzuk ekarriko dizkigute, gogoraraziko digutenak, txarangekin salto egiten dugunean bezala, besotik helduta, beti aurrera egiten duen herri eta komunitate bat garela.
Adimen artifizialaz hainbeste hitz egiten den garai hauetan, inauteriek, egun batzuetan zehar behintzat, arazoak erlatibizatzeko ariketaren jakinduria naturala dakarte gogora, adiskidetasuna eta umore ona balioan ipiniz.
Gure osasun pertsonala eta soziala hobetzeko eta indartzeko erremedio gisa, sakonki tolosarrak diren jai paregabe hauek ere badituzte hain desiragarriak ez diren albo-ondorioak. Behar baino zabor gehiago sortzen dugu; gomendagarria dena baino gehiago edaten da, eta zaratak, batzuetan, tamalez, festa gortzen du. Izan gaitezen arduratsuak. Bizitzan bezala, orekan dago gakoa. Hala ere, bada gai bat erabateko irmotasuna eskatzen duena, eraso matxistena. Guztion konpromisoa behar dugu gure festarik kuttunenak indarkeriarik gabe ospatu daitezen.
Inauterien miraria posible egingo duten pertsona guzti horien lanari gure esker ona aldez aurretik adieraziz, goza ditzagun gure festa maitatuenak.
Gora inauteriak eta gora Tolosa!
Tolosako EAJren udal taldea; Xarles Iturbe eta 6 zinegotzi gehiago