Gure eskualdea bi aldiz zeharkatuko du Korrikak: astelehenean eta larunbatean. Aurtengoan, Galtzaundi Euskaltzaleen Elkarteak bi aldiz hartuko du lekukoa, Korrika Tolosaldera sartzen den bi aldietako lehen kilometroan: astelehenean, Korrikaren gidaritza gure eskuetan izan genuen Lizartzan, Nafarroako muga zeharkatzean; eta martxoaren 28an, larunbatean, 13:00etan hartuko dugu lekukoa Ikaztegietan. Tolosaldean Korrikak egingo dituen lehen metroetan lekukoa jasoz, keinu berezia egin nahi izan dugu Galtzaundikoek: eskualdean euskaltzaleok elkarren eskutik ekiteko beharraren garrantzia azpimarratu nahi dugu horrela.
Beraz, elkarrekin Korrikan parte hartzeko gonbita zabaldu nahi dizuegu guztioi. Izan ere, milaka euskaltzaleren bultzadari esker eta oztopo guztien gainetik, AEKk lortu du hamaika egunez euskara erdigunera ekartzea, eta gizarteko gehiengo zabala euskararen normalizazioaren alde dagoela erakustea. Urtzi Urkizuk dioen bezala, bi asteotan Korrikan bat egiten duen jendetza ikusita, milioi bat euskaldun ez, baizik eta hiru milioi euskaltzale dauden inpresioa ematen du.
«Ez da aski euskararen alde egotea; ezinbestekoa da euskararen alde egitea»
Baina, euskararen eta hizkuntza-eskubideen aurkako oldarraldi antolatuaren aurrean, ez da aski euskararen alde egotea; ezinbestekoa da euskararen alde egitea. Urratsak ematea, konpromisoak hartzea, antolatzea. Galtzaundin darabilgun Lorea Agirreren esanak dioen bezala, «Kontua ekitea da. Egitea. Egiten duguna gara». Beraz, mugi dezagun gutako bakoitzak euskararen herria, ingurua mugiarazi arte. Euskara gara!