Eukene Larrarte (Tolosa, Gipuzkoa, 1998) oso gustura aritu zen iaz Laboral Kutxa taldean. Baina erdizka geratu zen: «Gustatuko zitzaidan gehiago lehiatzea, batez ere nazioarteko probetan», aitortu du. Horregatik onartu zuen denboraldi amaieran Bizkaia-Durango taldeak egin zion eskaintza: «Egutegi zabalagoa dut, eta aukera gehiago nazioartean lehiatzeko». Dezenteko jauzia zen, baina «prest» ikusi zuen bere burua «beste pauso bat» emateko. «Gauzak ongi egin nahi nituen, eta sentitu nuen momentua zela».
Orduan hartutako erabakiari zentzua eman dio orain artekoak. Gehiago lehiatu nahi zuen nazioartean, eta gehiago lehiatu da: besteak beste, bi aldiz aritu da Txirrindularitzaren Nazioarteko Batasunaren (UCI) maila goreneko probetan, World Tourrean: otsailean, Ronde van Drenthe klasikoan, Herbehereetan, eta, maiatzean, Burgosko Itzulian, Espainian. «Denetarik» bizi izan du. «Klasikoan konturatu nintzen iritsi berria naizela, eta halako lasterketetan esperientzia pixka falta zaidala. Burgosen, berriz, oso ondo aritu nintzen». Tartean, Euskal Herriko Itzulian aritzekoa zen, baina positibo eman zuen COVID-19a atzemateko proba batean. «Kolpe gogorra izan zen. Ilusio handia egiten zidan etxeko lasterketa garrantzitsuenean parte hartzeak».
