«Denbora daramat nire ahotsari jarraitzen eta nahi duena egiten»

Erabiltzailearen aurpegia

Ainhoa Arteta soprano tolosarra Giacomo Puccini konpositorearen Madama Butterfly operan ariko da Donostiako Musika Hamabostaldian, abuztuaren 13an eta 15ean. Cio-Cio San protagonistaren rola interpretatuko du obran.

Ia hiru hamarkada dira Donostiako Musika Hamabostaldian lehen aldiz kantatu zuela. Mundu osoko agertokietan izan da ordutik Ainhoa Arteta sopranoa (Tolosa, Gipuzkoa, 1964). Ongi gogoan ditu bere ibilbideko une gozoak, esaterako, Metropolitan zein Placido Domingo sariak irabazi zituenekoak. Baita gaziak ere, nahiz eta badakien horiei alde onik aurkitzen ere. «40 urterekin ahots krisi izugarria eduki nuen, baina krisitik fenix hegazti baten moduan atera nintzen, indartuta eta hobetuta». Askotariko rolak interpretatu ditu urteotan, eta argi du aurrera begira zer egin nahi duen: «Egiteko geratzen zaidan gauza bakarra da nire ahotsari jarraitzea. Hori, zoriontsu izatea, abesten jarraitzea eta nahi dudanean erretiratzea, ez beste batzuek nahi dutenean». Hamabostaldian berriro kantatuko du datorren astean; protagonistaren rolean ariko da Madama Butterfly operan. Aurkezpenaren ostean, tarte laburra hartu du BERRIAren galderei erantzuteko, entseguen aurretik atseden hartu beharra baitzuen.

Urte hasieran estreinatu zenuen Pucciniren Madama Butterfly. Zer aldatu da ordutik hona?

Laguntza gutxi jaso nuen, eta ia ez genuen entsegurik egin agertokian; ahotsa prest izan arren, ez nintzen oso eroso sentitu estreinaldian. Oso pertsonaia konplexuak dira, eta, zuzendarien laguntza jaso ezean, oso zaila da aurrera egitea. Baina, orain, eszena zuzendariaren eta orkestrakoaren laguntza eduki dut. Horregatik diot obraren estreinaldia orain izan dela. Halere, bost urte barru egingo den Madama Butterfly ezberdina izango da, produkzio bakarrean zaila baita halako pertsonaiak ondo menperatzea. Abestu ondoren, nekatuta, bai, baina harro sentitzen zara. Hau emanaldi askoren lehena izatea espero dut.

Pucciniren beste opera batzuk ere egin dituzu aurrez. Zer ematen dizu haren obrak lantzeak?

Denbora daramat nire ahotsari jarraitzen; berak nahi duena egiten dut, eta eroso sentitzen da Pucciniren roletan. Hainbat urtez landu ostean, uste dut Puccini emakumeen roletan aditua dela. Sinestezina egiten zait gizon batek emakumeek sentitzen dutena hain modu zehatzean transmititzea. Nigan ere bada oso indartsua den aktore sen bat, eta bere obretan osotasunean landu dezakedala sentitzen dut. Horrek ere eragina du nire ahotsa, pertsona, eta psikea eroso sentitzeko garaian.

Segi irakurtzen

Erlazionatuak

Ainhoa Artetak 'Madame Butterfly' opera eskainiko du Kursaalen

Tolosa

Soprano tolosarrak 80. Donostiako Musika Hamabostaldiaren barruan parte hartuko du Pucciniren obra entzutetsuan, abuztuaren 13an eta abuztuaren 15ean.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!