Ziazerba pestoa

Erabiltzailearen aurpegia

Ziazerba edo espinaka pestoa egin dugu Aintzane Artolarekin, eta ondoren pastari gehitu diogu.

Pestoa italiar saltsa bat da, eta normalean albahaka orriekin egiten da. Parmesano gazta eduki ohi du, baina oraingoan, guk, albahakaren ordez ziazerbak erabiliko ditugu, eta Idiazabal gazta parmesanoaren tokian. Albahaka, normalean, entsaladetan jaten da mozzarella gaztarekin. Baina pestoa saltsa bat da, eta pasta laguntzeko erabiltzen da. Saltsa hori egingo dugu gurera ekarriz, Idiazabal gazta lehor batekin. Oso erraza da egiteko.

Fruitu lehorrekin hasiko gara. Hasteko, intxaurrak eta arbendolak txikituko ditugu krema bat lortu arte. Irabiagailu oso indartsu bat ez badugu, izotzak apurtzeko labana edo erabili dezakegu. Gurin edo krema moduko bat geratzen da. Ez badugu irabiagailurik, krema eginda ere erosi dezakegu.

Krema horri zizerbak gehituko dizkiegu. Lehenengo ziazerbak garbitu egingo ditugu, eta zatitan moztuko ditugu handiegiak ez geratzeko. Horiek ere irabiagailuan sartuko ditugu. Krema hori ondo geratzeko olioarekin batzen joango gara; pixkana olioa gehituko diogu. Oso lodia geratzen dela ikusten badugu, olio gehiago botako diogu.

Hostoak berde-berde geratzeko limoi zuku pixka bat gehituko diogu. Limoiak ez dio oxidatzen uzten, eta berde kolorea mantenduko du. Gatza ere gehituko diogu, eta baita gazta ere. Guztia ez, gazta pixka bat gero platerean gainetik botatzeko utziko dugu.

Guri gehien gustatzen zaigun pasta jarriko dugu irakiten, gatz eta olio puntu batekin. Al dente erara egingo dugu, 4-8 minutu artean, eta jarraian pesto saltsa botako diogu gainetik. Ez dugu gehiegi berotuko, lortu nahi duguna udarako saltsa fresko bat delako. Utzi dugun gazta botako diogu gainetik, eta platera bukatzeko pinaziak jarriko ditugu.

Pinaziak, ordea, zartagin bero-bero batean pixka bat txigortuko ditugu, gehiegi erre gabe.

 

OSAGAIAK

· 250 gramo ziazerba

· 50 gramo intxaur

· 50 gramo arbendola edo almendra

· 50 gramo Idiazabalgo gazta birrinduta

· Limoi zuku pixka bat

· Oliba olioa

· Gatza

· Pinaziak

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!