COVID-19 bezala izendatutako birusak salbuespen egoera baten testuinguruan utzi gaitu. Izan ere, bizi dugun osasun krisialdiarekin batera goi-burgesiaren ofentsiba politikoa etorri zaigu gainera langileoi. Egunerokotasuna hankaz gora jarri zaigu eta milaka eraso jasaten ari gara. Horren adibide dira babes neurririk gabe lanera joatera behartuta dauden milaka langile, kaleratzeak zein Aldi Baterako Enplegu Erregulazio Espedienteak jasan dituzten langileak, tratu txarrak eragiten dizkion kidearekin 24 orduz etxebizitza partekatzera kondenatuta dagoen emakumea, poliziaren jazarpenak jasan behar izatea kalera irteteagatik... Hori gutxi balitz, burgesiaren erasoaldi hau geldiarazteko esku hutsik utzi gaitu, askatasun politikoak ukatu zaizkigularik
Baina guk argi daukagu langileon autoantolakuntzak soilik salba gaitzakela erasoaldi honetatik. Hori horrela, aurreko irakurketa batean publiko egin genuen Gazte Koordinadora Sozialistak (GKS) "burgesiaren ofentsiba gelditu" izenpean martxan jarritako dinamikara atxikitzen ginela kolektiborik kolpatuenen babesa egikaritzeko. Horrenbestez, Tolosaldeko zenbait eragilek indarrak batu eta hainbat mekanismo jarri ditugu martxan langileriaren sektorerik zaurgarrienak defendatzeko. Mekanismo horiek guztiak GKSren dinamikaren baitan aurrera eramandakoak dira, baina kolektibo bakoitzat arlo zehatz batean egin dugu ekarpena. Tolosaldeko Gazte Frontetik, zehazki, jazarpen polizialaren alorrean egingo dugu ekarpena, babeserako bitartekoak eskainiz. Horretarako, batetik, poliziaren abusuak jasan dituztenen testigantza bilketa jarri dugu martxan; eta bestetik, asistentzia juridikoa eskainiko dugu ondorengo kasutan:
- Osasun beharren ondorioz kalera irten eta poliziak jazarri zaitu?
- Kolektibo zaurgarrriei laguntzeko kalera irten eta poliziak jazarri zaitu?
- Kalera irten behar duzu eta ez dakizu zein diren justifikatutako kasuak?
Egoera horietakoren bat bizi baduzu gurekin harremanetan jartzera gonbidatzen zaitugu email bat bidaliz edo ondorengo telefono zenbakiaren bidez:
- tolosaldekogaztefrontea@gmail.com
- 688 805 610
Nolanahi ere, Gazte Koordinadora Sozialistak martxan jarri duen dinamikaren nondik norakoak hobeto ulertzeko hile hasieran publikatu zen sarrera irakurtzera gonbidaten zaituztegu.
Burgesiaren ofentsiba gelditu!