Ustelkeriaz ari dira ustelak diren buruak. Lerroburuak betiko leloekin betetzen dituzte. Transgenikoa den sistema politikoa ernaldu dute; nahieran jarri diote esanahia demokraziari.
Eta, demokrazia faltsu horren sareetan, sokak askatu eta korapilorik gabeko doktrina politikoa osatzen ahalegintzen gara. Herritarrak hutsalak garen sisteman herri politika egiten saiatzen gara. Erabakitzeko eskubidea eskatzen diogu erabakitzen uzten ez digunari; are gehiago, eskatzeko baimena ere ematen ez digunari. Zapaltzaileen kaltetan eta zapalduen mesedetan, zapaldu ez gaitzatela eskatzen diegu zapaltzen gaituztenei. Ez dugu artaldeko ardi beltzak izan nahi, baina bai ardilatxak. Badirudi mendean hartu gaituztenekiko menpekotasuna dugula.
Hemerotekak honela dio: Euskal Herriarentzat edo euskaldunontzat mugarri izan diren lorpenak sistema monarkiko-parlamentariotik ihes eginda jaio dira. Kronologiak, ostera, honela dio: jostorratza eta haria hartu eta bidea josten ari gara. Bidean aurrera goaz, bai; baina, bide zuzenetik oker edo bide okerretik zuzen?
Euskaratik urruntzen.