Ibilbide luzea du Amaia Garmendiak sukaldari lanetan. Aurretik, Zegaman lanean aritu bada ere, orain, «bertatik bertara» Ikaztegietan kozinatzen du. Ikaztegietako ostatua zapaltzen dutenak «orokorrean eskertuak» direla jakitera eman du Garmendiak. Bertan topatu daitezkeen postreetako bat nola sukaldatzen duen azaldu du Amaia Garmendiak: pantxineta. «Kanpotik jendea etortzen da, espresuki, Ikaztegietako ostatuko pantxineta jatera».
Ezagutu dezagun bada, Euskal Herriko postre ezaguna den pantxineta nola egiten duen Amaia Garmendiak. Urte luzez prestatzen baitabil orendaindarra.
Lehen pausoa krema egitea izango da. Azkenean, denbora utzi beharko zaiolako, behin krema eginda dagoenean hozteko. Honela, kazola batean 600 ml esne botako ditugu, eta berotzen jarriko dugu. Bertara, kanela zotza eta zitrikoen azalak botako ditugu, eta infusionatuko ditugu. Berotzen hasten denean, itzali eta infusionatzen utziko dugu.
Beste alde batetik, hurrengo osagaiak hartu eta papila moduko bat prestatuko dugu, hagaxka baten laguntzarekin: krema egiteko arrautzak (3 gorringo eta arrautza oso bat), azukrea eta maizena. Esnea apurtxo bat epeltzen denean, kanela zotza eta limoi eta laranja azalak aterako dizkiogu, eta berriro berotzen jarriko dugu. Prest dugun papila gehituko diogu esneari. Hagaxkaren laguntzaz azkar-azkar nahastuko dugu, loditu arte. Gure krema pastelera prest izango dugu, orain hozten uzteko garaia da. Gainean film papera jartzea komenigarria izaten da. 15 bat minutu normalean nahikoak izaten dira.
Hurrengo pausoan hostorearen txanda izango da. Behean lamina bat zabalduko dugu; nahi izatera moldea erabilita edo molderik gabe, sukaldariaren aukera. Gainean, erdian, krema pastelera jarriko dugu, behin hoztuta dagoela. Ez dezala izkinak ukitu. Izan ere, izkinak goiko masarekin itsatsi beharko ditugu. Gainetik, beste hostore lamina jarriko diogu. Honela, izkinak, goikoak eta behekoak itxiko ditugu elkarren kontra. Nahi izatera izkinak arrautzarekin pintatu daitezke. Honela, goiko eta beheko partea pegamenduarekin bezala itsatsita geratuko dira. Beste aukera bat izan daiteke arrautzarik erabili gabe behatzak erabilita zanpatzea.
Hirugarren pausoa gainazalari dagokio. Hostore oreari gainetik, pintzel baten laguntzarekin, arrautza botako diogu; margotu egingo dugu. Ondoren, almendra laminatua edo pikatua jarriko dugu. Ondoren, azukrea botako diogu.
Aurretik, labea berotzen jarriko dugu, 15 bat minutu lehenago, 180 graduan. Behin labea bero dagoela, gure errezeta barruan sartuko dugu. Hostorea ondo egin dadin 20 bat minutuz izan beharko dugu labean. Behin doratu denean, gure pantxineta prest egongo da. Labetik atera eta hozten utziko dugu. Berez, pantxineta beroa jateko ohitura dago. Orduan, Ikaztegietako ostatuan zerbitzatzerakoan epeldu bat ematen diogu zati bakoitzari. Apaintzeko glas azukrea botako diogu gainetik.
OSAGAIAK
- Bi lamina hostore masa.
- 60 gr almendra laminatua edo pikatua (gustuaren arabera).
- Glas azukrea.
Krema pastelera egiteko:
- 700 ml esne.
- 4 arrautza (3 gorringo eta bat osoa).
- 120 gr azukre.
- 50 gr maizena.
- Kanela zotza.
- Limoi eta laranja azala.
