Festen hasierako suziria lehertu zenetik ordu gutxi pasa direnean, dozenaka gazte elkartu dira Irurako San Migel plazan, Gazte-festari hasiera emateko. 9:00etan zuten jarrita hitzordua, eta musikariek lagunduta, kalejira egin dute herriko landa-eremuko guneetatik. Eguerdian heldu dira plazara, eta bertan, soka dantza egin dute; 60 gazte inguru aritu dira dantzan. Amaieran, herritar gehiago batu dira fandangoa, arin-arina eta kalejira dantzatzeko. Giro ederra izan dute, eta ondoren, bazkaria egin dute Gazte Alaiak elkartean; 100 herritar baino gehiago elkartu dira.
Bitartean, haurrek elizako arkupeetan egin dute bazkaria. Hauek ere ondo pasatzeko aukera izan dute goizean, haur-parkea izan baitute ikastolako patioan. Arratsaldean ere zabalik dago, 15:30etik 18:30era.
Eguneko egitaraua amaitzeko, musika saioak izango dira. 18:30ean, poteo musikatua egongo da Zutik elektrotxarangarekin, eta 23:30ean hasita, EH Sukarra eta Olgetan taldeen kontzertuak.
Biharko eta datozen egunetako egitaraua ikusteko, egin klik hemen.
