Abiatu dira Iruran aurtengo sanmielak. Arratsaldean bota dute suziria Ttipi-ttapa elkarteko kideek. Euskaraz, gaztelaniaz, katalanez eta arabieraz egin dituzte hitzak. Esker ona adierazi diote festa batzordeari eurekin akordatzeagatik eta gogoratu dute hilean behin egin dituztela ibilaldiak herrian zehar, osasuntsu mantendu eta elkarren arteko harremanak egiteko. Ekimen honetan parte hartzeko deia luzatu diete herritarrei udaletxeko balkoitik.
Festak zoriontsuak eta errespetuzkoak izateko desioa luzatu dute Ttipi-ttapa elkartekoek eta berdintasunaren aldeko aldarria egin dute. Ondoren piztu dute festen hasierako suziria, herensugeak elizako kanpandorretik udaletxerako bidea hartu baino lehen.
Kanpai hotsekin batera Loatzo musika eskolako bandak lehenengo doinuak jo ditu eta dantzan abiatu dira erraldoiak. Buruhandiak ere gaztetxoen atzetik ibili dira harrapaketan.
Festen lehenengo eguna da gaurkoa eta gau parterako ekitaldi gehiago iragarri dituzte:
- 21:00. Barrikotea San Migel plazan.
- Ondoren. Muxutruk taldearen emanaldia.
Jai egitarauaren berri jakin nahi izanez gero, klikatu hemen.
