Aztergai diren herriko hiru udal eraikinak haurtzaindegiaren gaineko solairua, zaharretxea eta udaletxea dira. Astelehenean, Gorka Murua alkateak ongi etorria eman eta prozesuaren aurkezpena egin ondoren, Elhuyarreko kideek saioaren helburua eta planteamendua aurkeztu zuten: burutu beharreko ariketa herritarren ikuspegitik Iruran dauden beharrak identifikatzea zen, adin tartea kontutan hartuta (haur-nerabe-gazteak, helduak eta adinekoak). Beharrak identifikatzeko bertaratutakoak talde txikietan banatu ziren eta online konektatu zirenak beraien kabuz egin zituzten proposamenak. Ondoren saioan parte hartu zutenek adierazitakoa, postontziaren bidez bildutakoak eta udal teknikarien bileran jasotako beharrak konpartitu ziren. Amaitzeko hurrengo hitzorduen berri eman zen.
Azaroaren 16an, 17:00etan bigarren gogoeta saioa burutuko da eta hiru udal eraikinen erabilera eta egokitzapen proposamenak landu eta lehenetsiko dira. Parte hartzeko aurrez izena eman beharko da udaleko webgunean dagoen fitxa beteaz edo eta 943 69 26 74 deituaz. Zaintza zerbitzua ere egongo da.