N-1 errepidean gertatu da istripua, Irura eta Villabona artean. Tolosa eta Donostia arteko zerbitzua egiten duten TSST lineako autobus bat geldirik zegoen, Laskibarko geltokian, eta kamioi batek atzetik jo du Segurtasun Sailaren arabera. Ondoren, kamioiak su hartu du. Eztandak Iruratik entzun dituzte, "kea eta erre usaina" Tolosaraino iritsi da. Hamazazpi zauritu daude, horietako bat larri Segurtasun Saila berak esan duenez. Gipuzkoako Foru Aldundiaren arabera 20 bidaiari zeuden autobusean istripuaren unean.
Bi garabi lanean daude bertan, eta errepidea garbitzeko lanak luze joko dute, Tolosaldeko Ataria-k jakin duenaren arabera. Donostiarako noranzkoan erabat moztuta dago trafikoa, eta auto ilara luzeak daude. Trafikoa Iruratik desbideratu dute. Villabona aldera joateko Alkizatik bideratu dute zirkulazioa, auto ilarak sortuz. Gasteizerako noranzkoan irekita dago N-1 errepidea.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
