Juan Carlos Diez Sotok aparteko zaletasuna du: intxaurrak ipurdiarekin puskatzea, alegia. Irurako Festen barruan bere marka pertsona haustea lortu du. Minutu batean 83 intxaur puskatu ditu, ipurdiarekin, berriro ere esan beharra. Lau Guinness errekorren jabe da Soto eta Iruran bere marka pertsona gainditzea lortu du, orain artean minutu batean gehienez 81 intxaur puskatu baititu, ipurdiarekin.
Irurarrak plazan bildu eta erronka ikusi aurretik erakustaldiaz ere jabetu dira. Sotok intxaurrak ez ezik pistatxoak eta urrak ere puskatu baititu, hauek ere ipur masailak lagun. Erakustaldiaren ondoren, irurarrek teknika berezi hau probatzeko aukera ere izan dute. Sotoren ibilbidea telebistan ere jarraitu ahal izango dute bere jarraitzaileek, izan ere, hurrengo proba espainiar telebista kate bateko programa batean izango du.
110 intxaur jarri dizkiote Sotori errenkan baina 83 puskatzea lortu du 60 segundutan. Zaletasuna nondik datorkion galdetuta, istorioa sagardotegi batean apustu baten hasi zela aitortu du.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!