Goizean zehar, Ikaztegietan, osasun materiala bildu dute, Saharako errefuxiatuen kanpamenduetara eramateko. Pandemiarekin kanpamendu horietako egoera "zaila" bazen, "orain gehiago" dela esan du Fatimetu Zenan Saharako Gazte Aktiboak plataformako kideak. "Ahal den laguntza jasotzen ari gara, mugak irekitzen dituztenean bidali ahal izateko".
Erantzun "positiboa" jaso dute herritarrengandik, eta pozik agertu da Zenan. "Beharrak asko dira, baina, batez ere, Covid-19a prebenitzeko osasun materialean zentratu gara". Maskarak, gel hidroalkoholikoa, eskularruak eta parazetamol botika jaso dituzte. Irailaren 7an ere gauza bera egin zuten herriko plazan.
Osasun materiala biltzeaz gain, hainbat produktu jarri dituzte salgai. Saharar emakumeen jantzi tradizionalarekin, melhfa deiturikoarekin, mototsekoak, buruzko zintak, maskarak eta poltsak egiten ditu Zeugaz instagramaeko kontua daramanak. Lortutako diruarekin ere osasun materiala erosiko dutela azaldu du.
