Festetako egun handia nolabait nabari izateko ezustekoa izan dute ikaztegietarrek. 09:30ean, bi suziri jaurti dituzte udaletxetik, eta eztanda egitearekin batera herriko bi txistularik herriko kale eta txokoak zeharkatu dituzte txistua joz.
Aritz Aranbarri eta Aitor Tello herritarrek izan dute sanlorentzo egunari festa ukitua emateko ardura. Plaza hutsik. Ez ohiko irudia, baina herritarrek ere jarri diote festa ukitua herriari. Festa Batzordeak etxez etxe banatutako zapiek erantzun ona jaso dute. Ia etxe guztietan zintzilikatu dute festen iragarle izan den zapia.