Ikasturteaz ari gara oraingo honetan. Iraila hasiera urruti ikusten badugu ere, TOLOSALDEKO ATARIAk oraintxe heldu dio ikasturte berriari, eskualdeko ikasleak hartu eta tokiko komunikabidea bertatik bertara eta erraietatik erakusteari. Honela, Ikaztegietako Herri Eskolako ikasleak izan ziren lehenak erredakzioa eta irrati estudioa 2016-2017 ikasturte honetan bisitatzen.
Lehenik, erredakzioaren antolakuntza, kazetarien jarduna, albisteen aukeraketa, albisteen osaketa, euskarri ezberdinen garrantzia, sare sozialen ohiartzuna eta beste hainbat kontu entzungai izan zituzten. Eta ondoren, alor praktikora egin zuten salto: irrati estudiora. Lotsa alde batera utzi eta eurentzat prestaturiko lehiaketan murgildu ziren adin ezberdineko 30 ikasleak. Lau taldetan banatu eta proba ezberdinei egin behar izan zieten aurre. Azkenik, talde bakarrak garaipena eskuratzeraino. Jolasaren bitartez ere komunikazioa oinarri, oraingoan.