Ibarrak Kirolaren Egunaren lehen edizioa ospatuko du larunbatean, Emeterio Arrese Kirol Gunean. Jardunaldiaren helburua herriko kirol eskaintza ezagutaraztea eta herritarrak jarduera fisikoa egitera animatzea izango da.
Egitaraua 15:45ean hasiko da, 16:00ak bitartean egingo den izen-ematearekin. Ondoren, 16:00etatik 17:15era, orientazio froga izango da Bidetxur mendi elkartearen eskutik. LH4tik beherako haurrek heldu batekin parte hartu beharko dute.
17:30etik 19:00etara, berriz, hainbat aldibereko kirol-postu izango dira. Bertan, herriko hainbat kirol elkartek beren jarduerak ezagutaraziko dituzte. Herri kirolak Ibarra Herri Kirola eta Sokatira Taldearen eskutik, Bolo eta Toka Ibarra Kirol Elkartea-Deportivaren eskutik, eta gimnasia erritmikoa Belabieta Kirol Klubaren eskutik ezagutu ahal izango dira. Horrez gain, areto futbola Lauburu K.E. eskutik izango da. Kiroldegiko kirol-ikastaroek ere lekua izango dute jardunaldian, 16 urtetik gorakoentzat.
Jarduera guztietan parte hartzen dutenen artean zozketak egingo dira. Kirolaren Eguneko egitarauari amaiera emateko, 19:00etan, urteko kirolariei omenaldia egingo zaie. Horrela, Ibarrak herriko kirolarien eta kirol elkarteen lana aitortu eta eskertzeko tartea izango du.