Olatz Landa Tolosaldea LHIIko zuzendariak SpainSkills lehiaketan lortutako urrezko dominaren garrantzia azpimarratu zuen; «Euskadik lortu duen soldadurako estatu mailako lehenengo urrezko domina da», nabarmendu zuen. Jon Arozenak duen ikasteko gogoa, irmotasuna eta umiltasuna azpimarratu zuen, eta bere garapena «ikaragarria» izan dela gehitu zuen. Shangai eta Dusseldorferako zorterik onena opa zion Joni berari eta bere tutore Enrike Odriozolari. Hain justu, tutoreari buruz esan zuen bere ikasleek azken hiru EuskoSkills lehiaketetan urrezko domina lortu dutela, «bailarako soldadurako erreferente bat dela erakutsiz».
Arozena Cadinox enpresan ari da lanean, FP duala ereduaren barruan, eta omenaldian bertako lankideak izan ziren, baita bere senitartekoak eta Ibarrako alkatea ere.
