Energia komunitateak sortzeko prozesuarekin lanean jarraitzen du Ibarrako Udalak. Hain justu, urriaren 8an egin zuten lehen saioa, eta bertan Jose Ignacio Asensio Jasangarritasuneko diputatua eta Igor Zapirain Ibarrako alkatea izan ziren azalpenak ematen. Saio horien helburua da ibartarrek informazioa jaso ahal izatea, antolatzea eta beren energia-komunitatea sortzeko lehen urratsak ematea, energia berriztagarria sortzearen eta partekatzearen abantailei etekina aterata.
Datozen saioak ordea, data aldaketa izan dute. Hala, hurrengo saioak azaroaren 5ean eta azaroaren 19an izango dira, kultur etxean, 18:00etan hasita. Interesa duten herritar guztiek parte hartu ahalko dute. Azken bi dinamizazio-saioetan energia-komunitate baten parte izateak dakartzan onura ekonomikoak aztertuko dituzte, baina baita sozialak, komunitarioak eta ingurumenekoak ere. Era berean, energia komunitate bat nola kudeatu eta martxan jartzen ikasiko dute.