San Bartolome plaza haur eta gazteez bete da gaur arratsaldean, Txiribitu Aisialdi Taldeak antolatuta ur jolasetan parte hartzeko. Bero izugarria egin du arratsaldean, eta haurrez gain, gurasoek eta Txiribitu taldeko monitoreek ere gorputzak bustitzeko baliatu dute aukera.
Ur jolasen ondoren, 17:00etan egin behar zen sokadun bigantxen saioa, bertan behera geratu da beroagatik eta animalien segurtasuna bermatzeko helburuarekin. Hala ere, Ibarrako festek, normaltasun osoz jarraituko dute egunean zehar, eta hau izango da egitaraua:
- 18:00. Sagardo dastatzea, San Bartolome plazan.
- 19:00. San Bartolome bezperako kanpai-jotzea eta salbea, San Bartolome elizan.
- 21:00. Herri afaria, San Bartolome plazan.
- 21:15. Xaibor disko festa, Emeterio Arrese parkean.
- 22:30. Zezensuzkoa, San Bartolome plazan.
- 00:00. Zopilotes Txirriaos taldearen emanaldia, San Bartolome plazan.