Gehienentzat udako oporrak izan arren, Alurr dantza taldekoak martxan daude. Herriko festetako egitarauan lekua izan ohi du beraien emanaldiak, eta aurten, Laia ikuskizuna eskainiko dute. Larunbat honetan izango da, hilaren 26an, 22:45ean. Eguraldiak laguntzen badu, Emeterio Arrese plazan izango da, eta gainerakoan, frontoian.
Ez da taldeak udan zehar emango duen emanaldi bakarra, ordea. Hara eta hona dabiltza, eta datozen asteetan geldialdiak egingo dituzte, besteak beste, Trapagaranen, Aldaban, Ordizian, Altsasun edota Bidania-Goiatzen.
Horrez gain, ikasturte berriari begira ere jarrita daude dagoeneko eta matrikulazio epea zabalik dute, iraila amaitu arte. Webgunean bertan edota Ibarrako kultur etxean eman daiteke izena.