Abuztuaren 22tik 27ra luzatuko dira aurten, Ibarrako San Bartolome jaiak. Ohiko ekitaldiak izango dituzte herriko eragileekin elkarlanean; tomate eta piper banaketa herriko baratzezainen laguntzarekin, kirol eta kultur ekitaldiak herriko hainbat talderen eskutik, jokoak gurasoen lanari esker... Herri bizia da Ibarra eta horren erakusle da jaietarako prestatu duten egitaraua.
Jaiei hasiera emateko suziria Ibarrako euskara taldeak botako du abuztuaren 23an eta euskara erabiltzearen garrantziaz ohartarazteko erabiliko dute hitzordua, «izango bagara, erabili egin behar dugu, gastatu, duen zuku guztia atera, eskuz esku, ahoz aho, etxez etxe, belaunaldiz belaunaldi, edonon, edonoiz, edonorekin...».