Kirolerako arropa jantzita joan dira gaur Ibarrako Uzturpe ikastolako ikasleak ikastetxera. Izan ere, egun osoan zehar X. Elkartasun Kilometroa ospatu dute. Urtero ospatzen duten ekimena da inguruko eragileren bati diruz lagundu ahal izateko. Aurten, Ibarratik Misio Taldearentzat bideratuko dute dirua, eta talde horrek Indian, Ekuadorren eta Hondurasen aurrera eramaten dituen proiektuak egiteko erabiliko du gaur bildutakoa.
Berez, ikastolako zaharrenak plaza inguruan ziren korri egitekoak, baina Ibarra eremu gorrian dagoenez, ikastetxearen bueltan antolatu dute ekimena. Horrela, gelaka eta talde txikietan banatuta, ikastetxeari bueltaka egin dute korri guztiek. LH4tik DBHra bitartekoek goizean hartu dute parte egitasmoan, eta arratsaldean HH eta LH 1, 2 eta 3ko ikasleen txanda izan da.
Eman behar zituzten bueltak amaitzean, ikastetxeko aparkalekuan laranjak jateko tartea hartu dute, hau ere txandaka, eta goiz erdian, Garaguneko erabiltzaileen bisita jaso dute. Haiek ere ikastetxeari buelta bat eman diote, kasu honetan, oinez.
