Ibarrako Belabieta kiroldegiak neguko ikastaroak antolatu ditu. Pilates, yoga, cycling, eskalada, tonifikazioa, egokitze fisiko orokorra eta adinekoen gimnasia egitea aurreikusi dituzte. Ostiralera arteko epea egongo da ikastaroetan izena emateko eta Ibarrako Udalaren webgunean eskuratu daiteke izen emate orria.
Ikastaroak hiruhilekoak izango dira eta guztientzat prezio berean jarri dituzte, hau da, 80 euroan. Behin izena emanda, hiruhilekoa amaitzean, automatikoki berrituko zaie izen ematea hurrengo hiruhilekorako. Baja eman nahi dutenek 2021eko urtarrilaren 5a edo apirilaren 5a baino lehen eman ahal izango dute. Bestetik, hirugarren adinekoei hobaria aplikatuko zaie; horretarako, ezinbestekoa izango da errenta aitorpena aurkeztea, bestela, kuota osoa kobratuko baitzaie.
Aurten, telebista bidez emango dira ikastaro batzuk, markatutako orduetan joan ezin dutenentzat. Hala, aukera izango dute beste egun eta ordutegi batean ikastaroa telebista bidez egin ahal izateko, irakasle batekin. Horri buruzko informazio gehiago kiroldegian eskuratu ahal izango da.