Beti Gaztek hiru tiraldiak irabazi ditu, eta bederatzi puntu eskuratu. Ibarrak Murueta eta Zuraideren aurkako tiraldiak irabazi eta sei puntu eskuratu ditu. Muruetak eta Zuraidek berdindu egin dute bere tiraldian, eta bakoitzak puntu bana jaso dutenez, beraien artean jokatu behar izan dute hirugarren postua. Azkenean, Muruetak lortu du podiumean sartzea.
Xabier Eizagirre Ibarra taldeko tiratzaileak azaldu duenez, "aurreko jardunaldian aritu ginen bezala ikusita, gustura gaude bigarren postuarekin. Bloke moduan tira egin dugu, eta aurrekoan Muruetaren aurka galdu ondoren, gaur bi aldetara irabaztea lortu dugu". Beti Gazte beste koska bat gorago dagoela esan daiteke denboraldi honetan. "680 kilotan beraiek irabazi zuten eta 640koan ere bai. Oso txukun tiratzen dute, beti presioa konstante mantenduz, eta ez dute akats txikiena ere egiten", esan du Eizagirrek.
Gizonezkoei dagokionez, hurrengo astean 600 kilo denboraldia hasiko da, beste hiru jardunaldirekin, beste asteburu bat 560 kiloko mailan eta ondoren txapelketa mistoa.