"Bai, bai. 7.500 edo gehiago bai. Bi erretilu handi oraingoz". Halaxe aipatu du Iñaki Amondarain jatetxeko jabe eta langileak. Itxi arte, gainera, gehiago banatzeko asmoz daude. Hala ere, gaur ez dute afaririk emango, inguruko senideekin eta lagunekin egindako bazkariarekin nahikoa dutelako.
Azkenean heldu da eguna. Gaur itxiko ditu ateak betiko Ibarrako Izaskun jatetxeak. Emozio handiko orduak izango dira azken hauek. Egun guztian zehar ere sentimendu ugari nahastu dira bertan. Goizean, sorpresa bat eman diete bazkaltzera gonbidatuta zeuden lagun eta senideek. Amondarain-Lizarribar senideei agurra dantzatzeaz gain, bertso bat abestu eta lore sorta eta txapela bana oparitu dizkiete.
Argazkiak ateratzen nahiz dantzan aritu dira bazkal ostean bertaratu direnak, hamarkada luzeetako lanari behar bezalako amaiera eman eta ospakizun dotore bat egiteko. Bihartik aurrera, bestelako bizitza bat hasiko da bertako jabeentzat.
Hauek izan dira bertako jabeei kantatu dizkieten bertsoak, Aita semeak tabernan daude kantuaren doinuan:
Hutsetik hasi esku biluzik
akatsetatik ikasiz
lana bizimodu bihurtu zen
zuen onena eskainiz
Boda, bataio, mendizaleak,
paseanteak, gazteak
belaunaldien garapenaren
testigu ezin hobeak
Zuen kopetako izerdia
familiaren sostengu
ekinak eman duen errenta
horren ispilu gara gu
Deskantsu garaia iritsi da
gozatu bizi berria
urte askotan ez da ahaztuko
Izaskungo familia
