Ibarrako Kirol Elkarteak 52. urteurrena ospatzeko urteroko hitzorduak jarri ditu astebururako. Bihar, larunbata, diana izango dute eguna hasteko, 10:00etan, Giroarte taldearen eskutik, eta ondoren, hamaiketakoa egingo dute. Kalejira eta poteoa egingo dituzte bazkariaren aurretik. Txumitxatik hasiko dira eta hortik Danon Txokoa, Karlatz, Gaztelubide, Ibarrako plaza eta elkartean egingo dituzte geldialdiak.
Igandean aldiz, bola eta toka txapelketak egingo dituzte Emeterio Arresen, 10:30etik 11:30era. Lau sari emango dituzte; gizonen eta emakumeen orokorrak, eta herriko gizon eta emakume onenarenak.