Datorren urriaren 27 eta 28an, Ezpeletan (Lapurdi), Biper Festa ospatuko da. Azken lau urteotan egin duen moduan, Ibarrako herriak bertako piparraren postua jarriko du, herriko pipar ekoizleek, Hauspoa kultur elkarteak, 789 taldeak eta Ibarrako Udalak elkarlanean.
Ibarraren presentzia bermatu nahi dute Ezpeletan, eta hori dela eta, hurrengo iganderako, hilaren 28rako, Ibarratik Ezpeletako Biper Festara joateko autobusa antolatu dute, bertaratu nahi duten herritar guztientzat.
Autobusean festara joan nahi dutenek kultur etxean izena eman beharko dute, 943 670399 telefonora deituz edota kultur etxera bertaratuz. Autobusa goizeko 08:00etan abiatuko da Ibarratik eta arratsaldeko 17:30ean itzuliko da. Autobusa doakoa da eta egun horretako otordua norberaren kontura izango da. Urriaren 22an, astelehenean, amaituko da izena emateko epea.