Elkartasun Kilometroan biltzen duten dirua Greenpeace taldeari emango diote, klima aldaketaren aurkako lanean laguntzeko. "Berotze globala denon arazoa da" esan du ikastolak. Ikastolan bertan ari dira lantzen klima aldaketaren gaia.
Iaz Zaporeak proiektua laguntzeko egin zuten Elkartasun Kilometroa eta proiektuko boluntarioak ere izan ziren plazan, materiala saltzen, eta informazioa banatzen. Haitin izandako hondamendirako dirua biltzeko antolatu zuten lehen aldiz Elkartasun Kilometroa eta ordutik Saharako Tichla herrian eskola egiteko, gaixotasun arraroen AFESTTA eta Stop Sanfilippo elkarteak laguntzeko, Ziburuko Kaskarotenea ikastola babesteko eta Burkina Fasoko desnutrizioari aurre egiteko ere antolatu izan dute.