Asteburu berezia izango dute Ibarrako kultur elkarteko kideek: 37 urte bete ditu eta hainbat ekimen antolatu dituzte urtemuga ospatzeko.
Gaur, elkarteko bazkideen arteko mus saioa izango da 22:00etan. Egun handia, ordea, biharkoa izango da eta hainbat ekimen antolatu dituzte egun osoan zehar; goizean, diana eta hamaiketakoa egingo dituzte. Eguerdian, elkartetik atera eta herrira eramango dute festa giroa; poteoa egingo dute dultzaineroek girotuta. Edanaren ondotik, tripa bete behar omen da, eta horretarako aukera izango dute kultur elkarteko bazkideek. Horretarako, Ibarrako Kirol Elkarteko kideen laguntza izango dute eta beraiek arduratuko dira bazkaria prestatzeaz. Mahaitik altxa eta gero, kalejira egingo dute arratsaldean trikitilariekin.
Egun osoko festa, beraz, 37 urteko ibilbidea errepasatzeko eta ospatzeko.
EGITARAUA
URTARRILAK 20, OSTIRALA
22:00. Bazkideen arteko mus saioa.
URTARRILAK 21, LARUNBATA
10:00. Diana, Giro-Arte dultzaineroen eskutik.
11:15. Hamaiketakoa elkartean.
12:00. Poteoa dultzaineroek girotuta.
14:15. Bazkaria elkartean.
18:00. Kalejira tritilariekin.