Asteburuan bi emakumeri eraso egin diete Ibarran, Ibarrako Gazte Asanbladak eta Emakume Taldeak jakinarazi dutenez, emakumeekin eurekin hitz egin eta gero. Azaldu dutenez, drogatu egin zituzten festan zeudela. "Horren ondorioz, hiru orduko denbora tartean ez dira ezertaz oroitzen. Gogoratzen diren apurraren arabera, kontzientzia berreskuratzen ari zirenean, ibilgailu batetik bota zituzten guztiz desorientatuta, Ibarra ez zen leku batean". Dirua falta zitzaiela ohartu ziren gero.
Erasoa salatu dute Gazte Asanbladak eta Emakume Taldeak. "Nahiz eta oraindik gertatu den guztia ez dakigun, gertakari hauek pertsonen burujabetzaren eta oinarrizko eskubideen urraketak izan direla ulertzen dugu", nabarmendu dute, eta "irmoki salatu" dute. Horrelakoak saihesteko lanean segituko dutela berretsi dute, "jendea kontzientziatuz zein Gazte Festetan martxan izan ditugun brigada feminista bezalako ekintzak sortuz eta landuz". Horrelako jarrerek "ez dutela lekurik" esan dute, "ez Ibarrako festetan ezta beste inon ere".
Agerraldian, Ibarrako Gazte Asanbladako eta Emakume Taldeko kideez gain, herriko beste hainbat pertsona eta inguruko herrietatik joandako pertsonak izan dira.
Ertzaintzako iturriek BERRIAri baieztatu diotenez, bi emakumeen salaketa jaso dute polizia etxean, eta ikertzen ari dira.