Pasa den urtean Ibarrako gazteen parte hartzearen inguruko diagnosi bat abiatu zuten udalak eta Gaztematika, Gipuzkoako Haur eta Gazteen Sustapenerako Sistemak.
Azterketa hori hiru zatitan banatu zuten. Lehen fasean haurrekin kontaktu zuzena duten herriko eragile eta taldeak elkarrizketatu zituzten, eztabaida taldeak sortuz. Gero, ohitura eta mugimenduen arabera herria zonifikatu zuten, jokabideak behatzeko. Eta amaitzeko, inguruko garapen agentzien txostenak kontrastatu zituzten.
Diagnosi horren ondorioetako bat izan zen PSZ, Parte-hartzea Sustatzeko Zerbitzua sortzearena. Beste modu batera esanda, Gazteleku bat sortzearena. "Izen bat asmatu beharko dugu orain" dio hezitzaileetako batek.
Azkue auzoan dago lokala, lehen ludoteka zegoen leku berean. Hilabeteak eman dituzte egokitzapen lanetan. Gazteekin egin dute hori: txukundu, pintatu... Lan horren emaitza ostiralean ikusi ahal izan zuten, orduan inauguratu baitzuten.
Parte hartzeko deia
Gaztelekua kudeatzeaz arduratuko diren hezitzaileek dei egin zieten haurrek bertan parte hartzeko: "Zuek izango zarete protagonistak. Herrian eragile ugari daude, eta gauza ugari antolatzen dituzte. Orain zuek beste bat gehiago izango zarete".
Mikel Agirrezabala alkateak, berriz, gazteekin lana egin behar dela azpimarratu zuen: "Askotan diogu nerabeak etorkizuna direla, baina oraina ere badira. Ideia ugari dituzte eta orain baliabideak emango zaizkie, ideia horiek garatzen laguntzeko".
Bi gaztetxok ere hartu zuten hitza: "Gaztelekua ondo pasatzeko leku bat da, lagunak egiteko. Gauzak antolatzeko aukera dago, zuek proposatzen dituzuenak".
Atea, zabalik da.
