Mendi duatloian hiru proba egongo dira. 11:00etan, 7-13 urte bitarteko haurrak irtengo dira. 16:00etan, proba herrikoiaren txanda izango da. Mendian hiru kilometroko ibilbidea egin beharko dute korrika, ondoren, 7,5 kilometro bizikletaz, eta 2 berriro korrika. 16:10ean izango da proba luzea. Mendian 6 kilometro korrika eginaz hasiko dira. Bizikletaz 15 egin beharko dituzte, eta korrika berriro, 3 kilometro.
Irteera eta helmuga Ibarrako plazan egongo dira. Bertan, kirol aktibitatea amaitu ondoren, afari merienda egongo da parte hartzaile guztientzat. Izena emateko, www.mendiduatloia.com webgunean jarri dute aukera.
Antolatzaile lanetan, Ibarrako Sendi Ekintza Elkartea eta Kirol Elkartea aritu dira; udalaren babesarekin.
Txirrindulariak, igandean
Ibarran, jubenilen mailako 34. San Bartolome Saria igandean jokatuko da. Irteera eta amaiera Ibarran izango dira. Parte hartzaileak 10:00etan abiatuko dira, eta helmugan, 11:50ak inguruan egotea aurreikusten da. 75 kilometroko ibilbidea egingo dute txirrindulariek, eta tartean, Altzo eta Leaburuko gainak pasa beharko dituzte; helmugatik hamabi eta lau kilometrora egongo diren mendateak.
Probaren antolatzaile lanetan Ibarrako Kirol Elkartea aritu da, Ibarrako Udalaren babesarekin.