Xabi Fernandezek Iker Martinezen lekua beteko du Volvo Ocean Race lasterketako prestaketa proban. Ibartarra gaur abiatuko da Alacantetik, 13:00ak aldera. Amaiera, berriz, igandean izatea espero da.
330 miliako ibilbidea osatu beharko dute, baina ez da probarako puntuagarria izango. Lehen etapa puntuagarria, hilabete barru izango da. Dena den, gaurko etapan " denei gauzak ongi egitea gustatzen zaiela" aitortu du Fernandezek.
Bera izango da ontziburua, eta beste zortzi pertsonek osatuko dute tripulazioa: Nico Lunven, Michel Desjoyeaux, Rafa Trujillo, André Fonseca, “Ñeti” Cuervas-Mons, Anthony Marchand, Carlos Hernández y Fran Vignale.
Gaurko etapari dagokionez, Alacanteko Postiguet hondartzatik hasiko dute zazpi ontziek lasterketa. Tabarca irlara joango dira ondoren, Palmara bidean jarri aurretik. Handik, Alacantera itzuli beharko dute. Haize gutxi espero da, beraz etapa "zaila" espero dute.