Larunbatean seigarren urtez ospatuko dute Euskal Herria eguna. Eguerdian egingo den bazkarirako txartelak salgai daude jada Ibarrako Atari eta Alai tabernetan, 12 euroren truke. Aurten, gainera, zazpi lurraldetako ordezkariak izango dira bertan. Lizarrako eta Algortako lagunez gain, aurten Lapurdiko Itsasu herrikoak, Behe Nafarroako Baigorrikoak, Zuberoako Maulekoak eta Arabako Aguraingoak ere gonbidatu dituzte. Hala ere, edonor gonbidatu dute egun honetan parte hartzera.
Festa egun hau giro onean pasatzeko egun osoko egitaraua prestatu dute Ibarran, larunbaterako. 11:00etan hamaiketakoarekin hasiko da jaia, Ibarrako Arane iturrian. Kalejiraren ondoren, berriz, 12:30ean pailazoak izango dira plazan. 14:00etan bazkaria egingo da. Arratsaldean erronka ikusgarri bat egingo da herrien artean. Ondoren berriro ere kalejira, Subegin afaria eta gauean kontzertuak izango dira. Hortaz, festa berandura arte luzatzeko arriskua ziurra da.