Jexuxmari Mujikak ez du aurrera egin Urrezko Aizkora txapelketan. Maila bikaina erakutsi du ibartarrak Otsagabian, baina segundu gutxi batzuen gatik, agur esan behar izan dio lehiari.
Zortzi aizkolari aritu ziren lehian Otsagabian, larunbatean. Bi multzotan banatu zituzten lehiakideak, eta lehen lau postuak, multzoko lehen bi onenen artean jokatu ziren. Mujikak bere multzoko lehen postua lortu zuen, Oihan Larretxearen aurretik. Beste multzoan, Etxeberriak eta Mindegiak egin zuten aurrera.
Multzoetako lehenek bigarrenen aurka jokatu zuten, ondoren. Ibartarrak Mindegiari egin behar izan zion aurre, eta bi segundoko aldeagatik, kanporaketako finaletik kanpo gelditu zen. Larretxeari ere gauza bera gertatu zitzaion Etxeberriaren aurka. Bi finalistek hurrengo faserako txartela lortu zuten. Otsagabian garaile nor izango zen erabaki aurretik, hirugarren eta laugarren posturako lehia jokatu zen. Irabazleak, hurrengo kanporaketan aizkolariren batek huts egingo balu, bere ordez jokatzeko aukera izango luke. Larretxea eta Mujika aritu ziren postu horren atzetik, eta ibartarrak, segundo bateko aldeaz galdu zuen. Ondorioz, laugarren amaitu zuen kanporaketa.
Mindegia eta Etxeberriaren arteko lehian, azkenik, bigarrena nagusitu zen. Zubietakoa aurretik ibili zen, baina aizkora enborrean kateatu eta denbora dezente galdu zuen. Etxeberriak aukera aprobetxatu eta garaiena lortu zuen.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!