Martin Garitanok Uzturpe ikastolako Zero Zabor eskola tailerrak bisitatu ditu

Tolosaldeko Ataria 2014ko mar. 17a, 15:47
Gipuzkoako ahaldun nagusia Ibarrako ikastolan egon da programa bertatik bertara ikusteko. Proiektua Aranzadi zientzia elkarteak gidatzen du, eta bertako Juantxo Agirre Mauleonek emango du tailerren berri.

Aranzadi zientzia elkarteak, Kristau Eskolak, Ikastolen Federazioak eta Gipuzkoako Foru Aldundiak hitzarmena egina dute hondakinen kudeaketa egokia sustatzeko Zero Zabor tailerrak garatzeko eskoletan, eta horietako bat da Ibarrako Uzturpe ikastola.

Lehen Hezkuntzako haurrei zuzendutako programa da, eta hiru tailer ditu. Lehenengoan, Hamaiketakoa izenekoan, zenbat hondakin sortzen dugun eta horiekin zer gertatzen den aztertzen dute. Horrela hondakinak murrizteko lau teknika lantzen dituzte: Beheratu, Berrerabili, Birziklatu eta Birpentsatu. Bigarren tailerrean, Hor Konpost! deiturikoan, konposta zer den, zergatik egiten den eta nola egin behar den ikasten dute gazteek.

Hirugarren tailerrean, Ezagueren aldamiatzea izenekoan, ezagutzak berrikusten dituzte eta haien inpaktua neurtzen dute. Era berean, hamaiketakoan sorturiko hondakinen kuantifikazioa egiten dute berriz ere.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!