Ibarratik Misio Taldeak agerraldia egingo du gaur 20:00etan, Parrokiko lokaletan. Bertan, aurrera ematen ari diren hiru misioren inguruan ariko dira hizketan. Garapen proiektu hauen inguruan hitz egiteaz gain, Ekuadortik etorritako bi animatzailerekin mintzatzeko aukera egongo da, egun hauetan eskualdean baitaude.
India, Ekuador eta Hondurasen ari da lanean Ibarratik Misio Taldea, eta hori jasotako babesari esker dela gogoratu dute. Ibartarrak eta inguruko herritarrak gogoan izan dituzte eskerrak ematerako orduan. Udalaren ekarpena, Parrokiako Koruarena, Ibarrako Azokan eta Merkatu Txikiarekin lortua eta dohainik jasotako opariak ere aipatu dituzte misio taldetik. Orona Kooperatibak diru laguntza ematen hiru urte daramatzala aipatu dute, Hondurasen duten proiektua gauzatzeko. Legorretako Udala, Ugarotarrok Sendi Ekintza, eta Laskorain Ikastola ezin ahaztu, aipatu dute ibartarrek, «laguntza benetan oparoa» egin baitute. Azkenik, 150 familiaren urteroko konpromisoa gogoratu eta eskertu dute, besoetan hartu dituzten haurrengatik.