Zer nolako osasuna du euskarak Elduainen? Egunerokoan nola bizi dute euskara hizkuntza elduaindarrek? Galdera horiek abiapuntu harturik, euskarak herrian bizi duen egoera aztertzen ari da Elduaingo Udala, Uemarekin elkarlanean. Horretarako, galdetegia prestatu eta herritarren artean zabaldu zuten, eta joan den astean jasotako emaitzak aurkeztu zituzten herritarren aurrean.
Espainiako Estatistika Institutuak (INE) 2024an emandako datuen arabera, 250 herritar bizi dira Elduainen, eta horietatik 29k erantzun zuten galdetegia. Azken urteetan Elduainera bizitzera joan den herritarren profila erdalduna dela adierazi du Maite Bizkarrondo zinegotziak: «Azken urteetan estatutik kanpoko, eta baita estatuko erdal giroko jendea etorri da Elduainera bizitzera, eta egia da gehiengo horiek ez direla herriko ekintzetan integratzen». Elduainen euskaraz bizi diren herritarrak ere egoeraz jabetu direla aipatu du zinegotziak, «emaitzetan hala adierazi baitute; euskararen erabilera ahula dela diote zenbait arlotan».
Galdetegi hori lagungarri izango da hemendik hamar urtera udalak, Eusko Jaurlaritzak eta Uemak elkarlanean garatuko duten euskara sustatzeko Aroa Plana lantzeko. Bitartean, euskara eta kultura indartzen jarraituko dutela gaineratu du Bizkarrondok. Horren adibide da abenduaren 3an ospatuko duten Euskararen Eguna.
