Elduaingo Udalak web orria berritu du, www.elduain.eus helbidea mantentzen badu ere erabat itxuraldatuta aurki daiteke. Aurreko orrialdea «zaharkitua» gelditu zela diote udal ordezkariek.
IZFE, Informatika Zerbitzuen Foru elkarteak, eskainitako plataforma bat erabili dute, eta gero Elduaingo edukiez osatu dute. Irailean hasi ziren web orri berria osatzen; baina, eduki «dezente» sartu behar izan dituztenez, denbora behar izan dute erabat osatzeko.
Web orri berria ikusgarriagoa da, baina batez ere gauzak «argiago» izateak, behar den informazioa aurkitzea «errazagoa» egiten duela diote.
Erabiltzaileentzat web orria «erakargarriagoa» egitea zen helburua, «jende gehiagok» erabiltzeko, eta ohiko informazio edo dokumentazioetatik harago berriak, sare sozialetako loturak, agenda, etab. sartu dituzte. Alkateari zuzenean idatzi ahal izateko formulario bat ere aurki daiteke.
Alde batetik, udalari buruzko informazioa aurki daiteke: hirigintzako arauen planoak, tramiteak, udalaren egitura, mankomunitateak... Bestetik, herriari buruzkoa: herria ezagutzeko aukera, etxeen argazkiak, festetako argazkiak, bideoak...
Sare sozialen presentzia ere areagotu dute. Twitter, facebook eta youtube kontuak ditu udalak, eta herritarrek bertatik herriko informazioa jasotzeko «ohitura» izatea ere nahi dute.
Bestalde, web orri berriaren plataformarekin mugikorretan ere «ikusgarritasun» handiagoa lortu dute, eta alde horretatik ere «erabilgarriagoa» egin dute.
GARDENTASUN BILA
Web orri berriarekin «gardentasuna» ere bilatu nahi izan du udalak, eta horretarako eduki desberdinak sartzen saiatu dira: aurrekontuak, lan egutegiak...
Jendearen iruzkinak entzuteko «gogotsu» daude. Pixkanaka web orria osatzen jarraituko badute ere, herritarrek izan ditzaketen iritziak helarazteko eskatzen diete herritarrei, eta horretarako elduain.eus web orrian sartzeko «gonbita» egiten diete.
IZFEk eskainitako plataforma batetik abiatuta osatu dute udaleko web orria, eta udaleko informazioa biltzeaz gain herriari buruzko informazioa ere bildu dute.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!