Argazkilaritza gustuko duten elduaindarrek erronka berria dute aurretik, datozen hilabeteetarako. Izan ere, Kultura Batzordeak IV. Argazki Lehiaketa antolatu du 2016. urterako. Argazki lehiaketako argazkiekin 2017ko egutegia osatuko dute.
Elduaingo herritar guztiei bideratuta dago lehiaketa, baina argazkiak ateratzerakoan kontutan izan beharko dute aurten argazkietan islatu beharko duten gaia: lau urtaroak Elduainen.
Epaimahaiak aukeratutako lehenen eta bigarren argazki onenek sariak jasoko dituzte 2016 urte bukaeran egingo den sari banaketan. Hala ere, parte hartzaile bakoitzak gehienez sari bakarra jaso dezake.
Argazki erakusketa
Lehiaketan parte hartzen duten argazkiekin, erakusketa bat antolatuko da azaroan zehar, eta argazkiak ikusi ondoren, herritarrek gustukoen dituzten argazkiei bozka emateko aukera izango dute, eta aukeratuekin 2017ko egutegia osatuko da. Aipatu, erakusketara teknikoki baldintzak betetzen dituzten argazkiak bakarrik iritsiko direla.
Hala ere, lehiaketan parte hartzeko interesa duten herritarrek epeei, baldintzei edo sariei buruz informazio gehiago eskuratu nahiko balute, horretarako aukera dute elduain.eus web orrian.