Eguraldiak ez bazuen hainbeste lagundu ere, ikusmina sortu zuen larunbatean Errezilen egindako giza probak. Bertako gazteak eta Bidaniakoak nor baino nor aritu ziren, eta azkenean errezildarrek irabazi zuten. Bidaniarrak ziren faboritoak, baina ezustekoa eman zuten etxekoek eta proba ondo prestatu zutela erakutsi zuten.
20 minutuz 600 kiloko harria mugitu behar zuten ahal zituzten plaza gehienak eginez. Lehenengoak bidaniarrak izan ziren, eta 60 plaza, zinta bat, hiru metro eta 76 zentimetro egin zituzten. Ondoren errezildarren txanda izan zen, eta 64 plaza, 3 zinta, 4 metro eta 40 zentimetro egin zituzten. Jendetza elkartu zen proba ikusteko Errezilgo plazan.
Argazkiak: Maider Ginea
