Baserritik

"Pentsurik gabeko heziketa batekin hazten ditugu txekorrak"

Txikitatik izan du Amaiur Garaizarrek baserriarekin lotura, baina duela gutxi eman eman du pausoa eta baserritik bizitzeko ahalegina egingo du anaiarekin batera. Galloway eta Aberdeen Angus Eskoziar arrazako behiekin dute Amalur ganadutegia. Horrez gain, Tolosako babarruna ere ereiten dute. 

Gustuko ditu natura eta animaliak Garaizarrek, eta baserriak erakartzen du. Anaiak ekarri zituen, "etxean haragi ona jateko", Galloway arrazako behiak. Gustatu, arra piztu, eta bertatik bizitzen hasteko pausua eman zuen. Pentsurik gabeko heziketa batekin hazten dituzte txekorrak, "naturalago".

Zuzeneko salmenta egiten dute. Erosleen sarea osatua dute, baina zabaltzea dute helburu: "Ondo saltzen, eta uste dut jendeak baloratzen duela haragi hau". Zapore ezberdineko haragia dela aipatu du. Kontsumoan ere eragin nahi dute, eta herritarrak kontzientziatu nahi dituzte erosketa egiterakoan. "Animalia ondo egon dela, ondo jan duela... baloratzea nahiko genuke". Ez dute kantitate handietan ekoizten, hori ez baitute helburu.

Amaiur Garaizarrek garbi du, "diru laguntzei esker jarri ahal izan da martxan ganadutegia, bestela oso zaila da". Ukuilua egin behar izan dute baserriaren alboan. "Herentzian edo ez baduzu jasotzen ia ezinezkoa da".

Bere ustez, "gutxi batzuk" dira baserritarren lana baloratzen dutenak, eta herritarrak kontzientziatu nahi dituzte.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!