Azken urteetan erakutsitako kirol mailagatik, Miren Larrarte bidaniarrak izan du aurtengo mezua bota eta bolanderei su emateko ardura. Batekin nahikoa ez, eta lau piztu ditu, herritarrei festak hasi direla ohartarazteko. "Ondo pasa San Bartolome festak" esan eta txapliguak lehertzearekin batera, trikitilariak herria girotzen hasi dira. Horrela, jada tradizio bihurtu den poteoari ekin diote.
Garai batean, eguerdiko 12:00etan hasten ziren, baina ohitura hura luzeegia egiten zitzaiela onartu dute herritarrek. Hortaz, azken urteetan bezala, Kontzeju tabernan tragoa hartu ondoren, karrozara igo, eta Iriarte Jauregia hotelera joan dira. Bertan, oinak astintzen hasi dira, trikitilariei erantzunez, eta urteroko argazkia atera dute.
Jarraian, haur eta gaztetxoen txanda heldu da. Aulki jokoan, koilara ahoan sartuta, lokotx biltze berezian, pirikaioarekin trebatzen edota soka-tiran aritu dira. Guztiek ere arratsalde bikaina pasa dute herriko plazan. Orain, meza garaia dute herritarrek. Gauean, berriz, herri afariaz gozatu ahal izango dute, Oihana Iguaran eta Unai Mendizabal bertsolariek alaituko dutelarik. Egunari behar bezalako amaiera emateko, dantza gehiago egiteko aukera izango da Elizagoien ahizpen eskutik. Bihar, berriz, herriko patroiaren eguna ospatuko dute; egun handia. Nahiz eta egitaraua oso oparoa ez izan, pilota partidetan nahiz giza proban jende ugari biltzea espero dute.
Bidania ere, beste zenbait herri bezala, eraso sexistarik gabeko jaien aldeko mugimendura batu da. Hori dela eta, aldarrikapen mezuz eta pankartaz bete dituzte herriko txokoak, eta festen atarian, txapa batzuk atera dituzte, nornahik soinean eraman ahal izateko.
