Martxan jarraitzen du Berrobiko Udalak abiatutako Urruti eraikinaren erabilera zehazteko parte hartze prozesua. 2004. urteaz geroztik udalaren jabetzakoa da Ipulategi kalearen parean kokatuta dagoen eraikina, eta herriaren zerbitzura jartzeko asmoarekin, martxoan bilera egin zuten herritarrekin batera. Bertan, herritarrek egindako ekarpenak jaso zituen udalak, eta orain, eraikinaren erabilera zehazteko saio irekiak egingo dituzte.
Lehen saioa datorren asteazkenean, ekainaren 12an, 18:00etatik 20:00etara egingo dute, udaletxean. Erabilera posible horiek irudikatuko dituzte, herritarren eta herriaren beharrak elkarrekin pentsatuz. Bigarren saioa, berriz, uztailaren 17an egingo dute, ordu eta leku berean. Lehen saioan irudikatutakoak eraikinera nola egokitu zehaztuko dituzte.