Irudimena baino ez da behar musika tresnak sortzeko

Tolosaldeko Ataria 2018ko abe. 1a, 12:55

Berrobiko Sanandresetako egitarauaren barruan, Trakamatraka ikuskizun musikala izan da goizean; gero birziklatutako materialekin musika tresnak sortzen ibili dira gaztetxoak.

Gitarra elektriko bat arraun edo aitzur batekin; txirula bat azenario bat zulatuz edo eskailera bati putz eginez; tronpeta bat mangera bat erabilita; edota Beethovenen Alaitasunaren Oda jotzeko moduko tronboi bat, mopa baten hodia baliatuz.

Musika sortzeko, eta musika tresnak asmatzeko, irudimena baino ez da behar. Hori da Jon Urrutiak Trakamatraka ikuskizunarekin islatu nahi izaten duena. Eta emaitza, benetan, harrigarria da.

Materialak birziklatuz edo etxean aurki daitezkeen edozein objektu moldatuz, instrumentu ezberdinak sortzen ditu modu parte-hartzaile batean Urrutiak, eta musika egiteko baliatzen ditu ondoren. Elementu horiekin sortutako tresnak modu didaktikoan erakutsi ditu, gaur, Berrobin, eta ondoren haurren sormenari bide eman dio, eta eurak utzi ditu musika tresnak sortzen.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!