Berrobi da, abuztuan, festak ospatzen dituen eskualdeko azken herria. Horregatik, ordea, ez dira okerrenak, esaerak esaten duen bezala, azken unerako uzten delako onena. Bihar ospatuko dute egun handia: San Agustin eguna. Bezperan, baina, haurrek hartu dituzte eskola ataria eta plaza. Batean, pilota erraldoien gainean, sagardotegian, txirristan nahiz idi parearen gainetik saltoka ibili ahal izan dira. Bestean, berriz, urez bustitako puzgarrian lasterketak egiten aritu dira. Egiten zuen beroa kontuan izanda, ederki etorri zaie freskatzeko abagune hori.
Goizean, jolasetan parte hartzeko aukera izan dute, eta apar festaz nahiz toka txapelketaz gain, erretirodunek bingoan jokatzeko nahiz dantzatzeko aukera izan dute. Ondoren, lorez lore, zenbat kolore lehiaketako sariak banatu dituzte. Gauean, berriz, helduen pilota partiden txanda izango da, Puro Relajo mariatxi taldearen dantzaldiaren aurretik.
Bihar, festen azken eguna izango da, eta era guztietako ekitaldiak ospatuko dira Berrobin: dantza emanaldia, trikitilari txapelketa, sagardo dastaketa... Amaitzeko, zahagi ardoa egingo dute, datorren urteko festen atzera kontaketarekin hasi aurretik.
