Argazkiak: Berrobi bizia ekimenaren barruan, Sukaldaritza goxoa tailerra jarri zuten martxan pasa den astean
Berrobi biziberritzeko lanetan ari dira, eta azken asteetan Berrobi bizia izeneko ekimenaren barruan hainbat tailer eta proposamen luzatu dizkiete herritarrei azken asteetan. Lehenik Bihotz biriketako bizkortze teknikak tailerra izan zen; eta pasa den astean Sukaldaritza goxoa tailerra. Bigarrenak, arrakasta handia izan zuen. Hogeita hamar pertsona inguru bildu ziren Bide-Ona elkartean Felix Belauntzaran sukaldariaren gidaritzapean, sukaldaritzaz gehiago ikasteko asmoz. Gainera, bertan garaian garaiko produktuei garrantzia eman nahi izan zien, eta bertan ekoiztutako barazkien kontsumoa bultzatzea ere helburu zuen tailerrak. Udaberri-uda sasoian izango da hurrengo sukaldaritza tailerra, garaiko produktuekin.
Baratza izateko aukera
Ekimen beraren barruan, baratza bat izatea gustatuko litzaieken herritarrei deialdi bat zuzendu diete. Baratza nahi izan, baina lur-sailik ez duten herritarrei zenbait eremu publiko eskainiko dizkiete erabilera iraunkor bat emateko. Ez da beharrezkoa izango baratzagintzan aditua izatea, baratza lantzeko "interesa" besterik ez dute eskatzen, eta beharrezkoa den "gainontzeko guztia zure eskura jarriko dugu, doan". Halaber, baratzaren lanketarako beharrezkoa den "prestakuntza guztia" ere aurreikusten du ekimenak.
Interesa duten herritar guztiak www.berrobibizia.eus web orrian edo 943 68 32 94 telefonoan eman dezakete izena abenduaren 30a baino lehen.
Gabonetako aisialdi plana
Haur eta gazteenentzat atseden egunak izaten diren egunetarako, berriz, aisialdi plana antolatu du Berrobi biziak. 09:00etatik 12:00etara izango dira ekimenak, Berrobiko plazan, eta bi adin talde ezberdinetan banatuta egingo dituzte tailer edo ekimen ezberdinak.
Bestalde, Udalak abenduaren 24rako prestatutako ekimen guztien berri ere eman du.
Jarrain, Berrobi biziak antolatutako ekimenak, eta Udalak abenduaren 24rako prestatutako egitaraua:
ABENDUAK 23, ASTEAZKENA
09:00-12:00. 3-7 urte bitartekoek: margoak, karetak, puzzleak... 8-16 urte bitartekoek: jauzi akrobatikoak, ohe elastikoak, gorputz ariketak eta jolasak.
ABENDUAK 24, OSTEGUNA
10:30. Gabonetako kantu-jira.
12:30. Hamaiketakoa.
17:00. Urrutin ohiko bilketa egingo da.
18:00. Olentzeroren etorrera Berrobira, eta haurrei oparien banaketa.
19:00. Gaztain jatea.
ABENDUAK 28, ASTELEHENA
09:00-12:00. Psikomotrizitatea, dantza, gorputz-ariketa eta jolasak, 3-7 urte bitartekoak. Ariketa teknikoak eta jolasak. 8-16 urte bitartekoak.
ABENDUAK 29, ASTEARTEA
09:00-12:00. Ginkana. Non gorde da 'Lore'? 3-7 urte. Mendi ibilaldia. Argazkilaritza rallya eta gehiago. 8-16 urte.
ABENDUAK 30, ASTEAZKENA
09:00-12:00. Nire etxea. Pentsatu, eraiki, erakutsi, 3-7 urte. Zine-emanaldia. Pelikularen inguruan ingelesez. 8-16 urte.
URTARRILAK 4, ASTELEHENA
09:00-12:00. Natura. Soroneako baratza, 3-7 urte. Bizikleta ibilaldia. Tolosatik abiatu eta Legorretara. 8-16 urte.
URTARRILAK 5, ASTEARTEA
09:00-12:00. Sormena. Gorputz espresioa eta oreka emozionala, 3-7 urte. Frontenisa eta pilota. Teknika, jolasak eta lehia, 8-16 urte bitartekoak.